Քաղաքացիները մտնում են ընտրատեղամասին անթույլատրելիորեն մոտ ՔՊ շտաբ, այնուհետև՝ գնում ընտրության. Գոհար Մելոյան

Գյումրիում ընտրախախտումները կարող ենք բաժանել երկու խմբի՝ տեխնիկական և բովանդակային, որոնք տեղավորվում են ՔՕ և Վարչական իրավախախտումների օրենսգրքի շրջանակներում: Այս մասին լրագրողներին հայտնեց Պառլամենտարիզմի զարգացման միջազգային կենտրոնի տնօրեն Գոհար Մելոյանը։

Նրա խոսքով, որոշ տեղամասերի տարածքներն այնքան փոքր են, որ խաթարվում է ընտրողի ընտրություն իրականացնելու իրավունքը։

«Դիտորդների կողմից ահազանգեր կան, որ տեղամասային կենտրոնների մոտ տարածքներում կուտակումներ կան»,- հայտնեց Գոհար Մելոյանը և հավելեց, որ Ընտրական օրենսգրքի համաձայն ընտրատեղամասին մոտ տարածքում որևէ անձ շարունակական իրավունք չունի գտնվելու։

«Ֆիքսել ենք դեպքեր, երբ երկու տեղամասերին անթուլատրելիորեն մոտ «Քաղաքացիական պայմանագիր» կուսակցության շտաբեր են հայտնաբերել։ Ֆիքսել ենք, որ քաղաքացիները մտնում են ՔՊ տեղամասային շտաբ, այնուհետև գալիս են տեղամասային կենտրոն և հակառակը՝ ընտրական իրավունքն իրականացնելուց հետո նորից մտնում են շտաբ»,- հայտնեց Մելոյանը։