Բողոքի ակցիաները կառավարության շենք կհասնեն, եթե մեր պահանջը չկատարվի. Ողջաբերդի բնակիչները ճանապարհ են փակել
Կոտայքի մարզի Ողջաբերդ գյուղի բնակիչներն այսօր ճանապարհ են փակել` պահանջելով վերադարձնել գյուղի նախկին վարչական ղեկավար Աշոտ Մուշեղյանին։ Նրանց խոսքով՝ Մուշեղյանին անհիմն են հեռացրել պաշտոնից: Ըստ ցուցարարների՝ վարչապետ Նիկոլ Փաշինյանն անտեսում է մի ամբողջ ժողովրդի պահանջը, այն է՝ Աշոտ Մուշեղյանը պետք է պաշտոնավարի Ողջաբերդում:
Գյուղացիները պատմել են, որ նույն հարցով իրենց նախորդ բողոքի ակցիան արդյունք չի տվել, և իշխանությունները որևէ քայլ չեն ձեռնարկել հարցին լուծում տալու համար:
«Վարչապետին ներկայացվել է 4 նամակ, այսինքն նա տեղեկացված է այս հարցի մասին: Ցավոք, առայսօր դեռ ոչ մի կարգավորում չի եղել: Ոնց կարելի է մի ամբողջ գյուղի պահանջն անտեսել: Մենք պահանջում ենք, որ Աշոտ Մուշեղյանը շարունակի պաշտոնավարել... Առանց ազատման հրամանի նոր գյուղապետ է նշանակավել, սա օրենքի կոպիտ խախտում է: Հայտարարում ենք` այս արարքը հանցակազմ է պարունակում», - ասել է ակցիայի մասնակիցներից մեկը:
Ցուցարարները դեմ են նոր գյուղապետ Գրիգոր Մելքոնյանի նշանակմանը, որի հայրը ևս ժամանակին եղել է իրենց գյուղապետը։ Գյուղացիների պնդմամբ՝ նվրա հայրը ժամանակին որևէ բան չի արել համայնքի համար, մինչդեռ Աշոտ Մուշեղյանը շատ բան է փոխել համայնքում։ Ցուցարարների խոսքով՝ բողոքի ակցիաները Ողջաբերդից կառավարության շենք կհասնեն, եթե իրենց պահանջը չկատարվի:
