Բաքվում այսօր «հարցաքննվել է» գեներալ-մայոր Դավիթ Մանուկյանը

Բաքվում այսօր տեղի է ունեցել Արցախի ռազմաքաղաքական ղեկավարների շինծու գործերով հերթական «դատավարությունը»։ Այս մասին հաղորդում են ադրբեջանական լրատվամիջոցները։

Այսօր «հարցաքննվել» է Արցախի ՊԲ նախկին հրամանատարի տեղակալ, գեներալ-մայոր Դավիթ Մանուկյանը։

Պատասխանելով դատախազին՝ Մանուկյանը խոսել է նաև Ռուբեն Վարդանյանի հետ իր հարաբերությունների մասին, ով նույնպես ներկայում ապօրինի պահվում է Ադրբեջանում։

Նա ասել է, որ Վարդանյանը 2023 թվականի սեպտեմբերի 27-ին ձերբակալվել է իր մեքենայով։ «Հինգ հոգով էինք, զրուցում էինք, Վարդանյանն էլ այնտեղ էր, հարցրի՝ ի՞նչ եք անելու։ Նա հարցրեց՝ իր մեքենայում տեղ կա՞։ Ես ասացի՝ «հարևանն էլ է ուզում մեզ հետ գալ»։ Զանգահարեցի կնոջս ու հարցրի՝ վստա՞հ է, որ հարևանը կգա, նա ասաց՝ «ոչ, որդին գտել է մեքենա»: Վարդանյանին ասացի, որ մեքենայի մեջ տեղ կա։ Հետո մեզ կանգնեցրին Լաչինի սահմանային անցակետում»,- պատմել է Դավիթ Մանուկյանը։Հաջորդ «նիստը» տեղի է ունենալու ապրիլի 7-ին։

Ընդհանուր առմամբ, դատարանի առաջ կանգնել է 16 հայ` Արցախի նախկին նախագահներ Արայիկ Հարությունյանը, Արկադի Ղուկասյանը, Բակո Սահակյանը, ԱԺ նախկին նախագահ Դավիթ Իշխանյանը, Պաշտպանության բանակի ԶՈՒ շտաբի նախկին պետ Դավիթ Մանուկյանը, ԱԳ նախկին նախարար Դավիթ Բաբայանը,ՊԲ նախկին հրամանատար Լևոն Մնացականյանը,   Արցախի նախկին պետնախարար Ռուբեն Վարդանյանը, քաղաքացիական անձինք՝ Վասիլի Բեգլարյանը, Էրիկ Ղազարյանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Գարիկ Մարտիրոսյանը, Մելիքսեթ Փաշայանը:

Ադրբեջանի գլխավոր դատախազի որոշմամբ՝ 1987-ի հոկտեմբերից մինչև 2024-ի ապրիլի 22-ն ընկած ժամանակահատվածում կատարված «հանցագործությունների» առնչությամբ գլխավոր դատախազության և երկրի այլ քննչական մարմինների կողմից քննված 1,389 քրեական գործերը միավորվել են մեկ վարույթում։