«Ես մաքուր հայ եմ, այլ արյուն չունեմ, հայ ազգն ինձ համար մեծ նշանակություն ունի»․ Ավրաամ Ռուսո
- Arnold Gevorgyan
- 5 hours ago
- 1 min read
Ազգությամբ հայ երգիչ, ՌԴ վաստակավոր արտիստ Ավրաամ Ռուսոն Երևանում հանդես կգա «25 տարի բեմում» հոբելյանական մենահամերգով:
Համերգը տեղի կունենա հունիսի 18-ին՝ Կարեն Դեմիրճյանի անվան մարզահամերգային համալիրում։
Երգիչն այս օրերին Հայաստանում է, իսկ երեկ նա հերթական անգամ հանդիպել է երկրպագուների հետ, ներկայացրել ու պատմել իր հեղինակած գրքերի մասին, կատարել իր հիթերը։
«Իմ մայրը մահացել է Հայաստանում՝ իր սիրելի հողի վրա։ Նա շատ հայրենասեր էր։ Շատ էր ցանկանում ինձ նվիրել Աստծուն, ուզում էր, որ ես վարդապետ դառնամ։ Դժբախտաբար կամ բարեբախտաբար ես այդ ուղին չընտրեցի, այլ ընտրեցի երգարվեստը»,-հանդիպման ժամանակ ներկաների հետ կիսվել է երգիչը։
Նա պատմել է, որ սակայն ուսանողական տարիներին աստվածաբանություն է ուսումնասիրել։ Իր գրքերով ցանկացել է ցույց տալ այն ճշմարտությունը, որն ինքն է բացահայտել։
«Գնացի այն ուղղությամբ, ուր քամին ինձ տարավ»,- նշել է Ռուսոն։
Երգիչն ապրում է Միացյալ նահանգներում, բայց հաճախ է լինում հայրենիքում։
«Ես մաքուր հայ եմ, այլ արյուն չունեմ, հայ ազգն ինձ համար մեծ նշանակություն ունի»,-անկեղծացել է երգիչը։
