Վահան Քերոբյանն իր գործով դիմել է ՄԻԵԴ
Էկոնոմիկայի նախկին նախարար Վահան Քերոբյանից MediaHub-ը հետաքրքրվեց, թե ի՞նչ եղավ իր դեմ հարուցված քրեական գործը, որում ութ հոգի էր ներգրավված։
«Այո, ութ հոգի էին, որոնցից մեկն արդարացվեց, հինգի նկատմամբ քրեական հետապնդումը դադարեցվեց գործուն զղջման հիմքով, որից երկուսը հիմա, կարծեմ, աշխատում են էկոնոմիկայի նախարարությունում, իսկ ես և «Սիներջի» ընկերության Աշոտ Հովհաննիսյանը մեղադրյալ ենք, դատական նիստերն ընթանում են, հիմնական դատալսումների փուլում ենք»,- ասաց նա։
-Իսկ այդ երկուսից մեկն արդյոք Լիլյա Սիրականյա՞նն է, որ օրեր առաջ նշանակվեց էկոնոմիկայի նախարարի տեղակալ։
-Չէ, Լիլյա Սիրականյանն ուղղակի գործով անցել է որպես վկա։ Ես խոսում եմ մեղադրյալների մասին։
-Իսկ ինչպե՞ս եք գնահատում դա, որ Լիլյա Սիրականյանն այս գործով անցել է, բայց իր նկատմամբ որևէ քրեական հետապնդում չի հարուցվել, աշխատանքից չի ազատվել, հիմա էլ նշանակվել է փոխնախարար։
-Իր աշխատանքի շնորհիվ, ըստ երևույթին։
-Պրոֆեսիոնա՞լ մասնագետ է։
-Չեմ ուզում քոմենթ անել, բայց մեր համատեղ աշխատանքը համարում եմ հաջողված։
-Ինչպե՞ս եք գնահատում, որ այդ ութ մեղադրյալից հենց ձեր երկուսի գործը միայն գնաց դատարան։ Եւ հիմա Դուք ազատության մեջ եք, բայց հնարավոր է նորից Ձեզ ազատարկեն, չէ՞։ Այս մասով ի՞նչ եք մտածում։
-Ի սկզբանե մեր համոզմունքը եղել է այն, որ գիտենք՝ արդար ենք, այսինքն՝ որևէ հանցանք չենք գործել, այդ կարծիքին էլ մնում եմ, և հուսով եմ՝ դատարանում կհասնենք դրա ապացուցմանը։
-Իսկ եթե դատարանում չհասնե՞ք դրան, և դատարանը որոշի, որ Դուք, այնուամենայնիվ, մեղավոր եք և հանցանք եք գործել։
-Առայժմ ոչ մի լուրջ կասկած առ այն, որ դատարանն անաչառ չէ, չունեմ։
-Հնարավո՞ր է՝ վերջում դիմեք ՄԻԵԴ։
-Մարդու իրավունքների եվրոպական դատարան դիմել ենք տնային կալանքի՝ ոչ իրավաչափ լինելու համար։ Գործն արդեն մուտք արվել է դատարան, այսինքն՝ մենք ունենք գործի համար արդեն դատարանում, և առաջիկայում պարզ կլինի՝ այդ գործը կգնա՞ առաջ, թե՞ ոչ։
-Մի կողմից ասում եք, թե դատարանի անաչառության վերաբերյալ այս պահին որևէ կասկած չունեք, մյուս կողմից ասում եք, որ դիմել եք ՄԻԵԴ։ Սա չի՞ նշանակում, որ ՀՀ եռաստիճան դատական համակարգի որոշումները Ձեզ համար արդար ու անաչառ չեն թվացել, որ դիմել եք Եվրոպական դատարան։
-Դե, գուցե անաչառ են եղել, բայց մենք կարծում ենք, որ սխալ են մեկնաբանել օրենքը։ Չեմ ուզում հիմա էդ մանրամասների մեջ մտնել։ Համենայնդեպս, մենք էդ ուղղությամբ գնում ենք, այսինքն՝ որտեղ տեսնում ենք նորմալ հնարավորություն մեր դիրքերը պաշտպանելու, օգտագործում ենք այս հնարավորությունը։
-Իսկ Դուք այս ամենի մեջ որևէ ուղղորդում կամ քաղաքական ենթատեքստ տեսնո՞ւմ եք, քանզի Ձեր անձի շուրջ մի տեսակ շատ շոու եղավ։
-Չեմ պատասխանի այս հարցին։
