Սաակաշվիլին դատապարտվել է 9 տարվա ազատազրկման

Միխեիլ Սաակաշվիլին դատապարտվել է 9 տարվա ազատազրկման։ Վրաստանի նախկին նախագահը մեղավոր է ճանաչվել բյուջետային միջոցների առանձնապես խոշոր չափերով յուրացման մեջ։

Որոշումը հրապարակել է Թբիլիսիի քաղաքային դատարանի դատավոր Բադրի Կոչլամազաշվիլին։Դատարանը հատուկ անվտանգության ծառայության նախկին պետ Թեյմուրազ Ջանաշիային մեղավոր է ճանաչել պաշտոնեական լիազորությունները չարաշահելու մեջ և տուգանել 300 հազար լարիով։

Սաակաշվիլին և Ջանաշիան նախկինում բազմիցս հերքել են մեղադրանքները՝ ասելով, որ դատավարությունը քաղաքական բնույթ է կրում:

Սաակաշվիլին ներկայումս կրում է վեց տարվա ազատազրկում։ Նրա նկատմամբ նախկինում դատավճիռներ էին կայացվել երկու այլ գործերով՝ Սանդրո Գիրգվլիանիին սպանողներին ներում շնորհելու և պատգամավոր Վալերի Գելաշվիլիին ծեծի ենթարկելու համար։