Ինչպես են տեխնոլոգիաները փոխում բանկային ոլորտը․ Վադիմ Գերասսիմենկո Ամիօ բանկի գլխավոր տեղեկատվական տնօրեն
Հարցազրույց Ամիօ բանկի գլխավոր տեղեկատվական տնօրեն Վադիմ Գերասսիմենկոյի հետ՝ AMIO Pulse նախագծի շրջանակում։
– Բանկային ինդուստրիան հեղափոխվում է ֆինտեխ նորարարությունների շնորհիվ՝ բլոկչեյն, ԱԲ, բաց բանկինգ: Ձեր կարծիքով, սրանցից ո՞րն ունի առավել մեծ ներուժ Ամիօ բանկի գործելաոճում փոփոխություններ անելու համար:
– Ամենամեծ ներուժը, իմ կարծիքով, ունեն բլոկչեյնն ու կրիպտոարժույթները։ Սա իրական հեղափոխություն է, որը փոխում է համաշխարհային տնտեսության հիմքերը և այն տեղի է ունենում ավելի արագ, քան սպասվում էր։ Բլոկչեյնի տեխնոլոգիան արդեն իսկ զգալի ազդեցություն ունի ֆինանսական հատվածի վրա, և մեր բանկի համար դրա հեռանկարները հսկայական են:
Երբ Հայաստանում օրենսդրական մակարդակով թույլատրվի կրիպտոարժույթների շրջանառությունը, մենք զգալի ռեսուրսներ կուղղենք այս ոլորտի զարգացմանը և հաճախորդներին կառաջարկենք բարձրորակ ծառայություններ:
– Տեխնոլոգիաները զարգանում են անասելի արագությամբ։ Ինչպիսի՞ն է Ձեր տեսլականը Ամիօ բանկի ՏՏ բաժնի համար առաջիկա 5 տարիների ընթացքում և ինչպե՞ս այն կվերափոխի հաճախորդների բանկային փորձառությունը։
– Մենք կշարունակենք զարգացնել մոբայլ և ինտերնետ բանկինգը՝ որպես թվային վերափոխման հիմնական գործիքներ: Մեր նպատակն է հաճախորդներին ապահովել բանկային ծառայությունների ամբողջական հասանելիություն՝ ինտուիտիվ հասկանալի և ապահով թվային հարթակների միջոցով:
Հատուկ ուշադրություն ենք դարձնում API-ներին և միկրոծառայություններին։ Ակտիվորեն օգտագործում ենք ավտոմատ կառավարման համակարգեր, հավելվածների տեղակայում և մասշտաբավորում՝ հնարավոր դարձնելով կատարել խափանումների հաճախականությունը նվազեցնող թարմացումներ։ Մեծ ուշադրություն ենք դարձնում մոնիտորինգին և տվյալների պաշտպանությանը՝ փոխգործակցության բոլոր մակարդակներում անվտանգությունը երաշխավորելու համար:
Արհեստական բանականությունն արդեն օգտագործում ենք և աստիճանաբար կընդլայնենք դրա օգտագործումը։ Մեր չատբոտը յուրաքանչյուր թարմացումից հետո դառնում է ավելի խելացի և շատ հարցերում փոխարինում է օպերատորին՝ նվազեցնելով զանգերի կենտրոնի ծանրաբեռնվածությունը: Ապագայում ԱԲ-ն կվերլուծի տվյալները՝ անհատականացված առաջարկներ ստեղծելու և բիզնես ռիսկերը բացահայտելու համար:
– Որպես ՏՏ բաժնի ղեկավար՝ ի՞նչ որակներ եք փնտրում Ձեր թիմի անդամների մեջ:
– Ազնվությունն իմ թիմի համար ամենակարևոր հատկանիշն եմ համարում։ Դա վստահության հիմքն է, որը թույլ է տալիս բաց խոսել խնդիրների մասին, չվախենալ սխալներից և գտնել դրանց լուծման ուղիները։ Առանց ազնվության արդյունավետ թիմային աշխատանքն ուղղակի անհնար է։
Երկրորդը՝ ներգրավվածությունն է: Ներգրավված մարդը կարողանում է հաղթահարել բազմաթիվ խոչընդոտներ։ Ինչպես ասում են՝ նրանք, ովքեր ցանկանում են անել, ճանապարհը կգտնեն, իսկ ովքեր չեն ցանկանում՝ պատճառ կգտնեն չանելու։
Երրորդը՝ ինքնակարգապահությունն է: Այս որակը ապահովում է կազմակերպվածություն, հուսալիություն և կանխատեսելիություն, հատկապես դժվար իրավիճակներում: Մենք փորձում ենք մեր թիմ ներգրավել հենց այդպիսի մարդկանց։
– Ո՞րն է այն հմտությունը կամ որակական հատկանիշը, որը, ըստ Ձեզ, կարևոր է ՏՏ ոլորտում հաջողության հասնելու համար, հատկապես բանկային ոլորտում։
– Ազնվությունից բացի, ես հիմնական որակներ եմ համարում ինտելեկտը, ինքնակարգապահությունը և հուզական կայունությունը՝ զուգորդված հաղորդակցման ուժեղ հմտություններով:
Ինտելեկտը թույլ է տալիս մասնագետին արագ տիրապետել նոր տեխնոլոգիաներին, վերլուծել բարդ խնդիրները և գտնել արդյունավետ լուծումներ։ Հաջորդն ինքնակարգապահությունն է։ ՏՏ ոլորտում աշխատանքը հաճախ կապված է մեծ ծանրաբեռնվածության, բարդ նախագծերի և մշտական ինքնազարգացման անհրաժեշտության հետ: Հաջողությունն անհնար է առանց ինքդ քեզ կազմակերպելու, հոգնածության ժամանակ մոտիվացված մնալու և ժամանակը արդյունավետ կառավարելու ունակության:
Կարևոր դեր են խաղում նաև հուզական կայունությունը և զարգացած հաղորդակցման հմտությունները։ Բանկային ոլորտում, որտեղ բարձր դինամիկան և սթրեսը նորմ են, կարևոր է պահպանել հանգստություն, հարմարվել փոփոխություններին և արդյունավետ կերպով շփվել տարբեր մարդկանց հետ՝ ինչպես թիմի ներսում, այնպես էլ դրսում: Հաջողակ մասնագետը ՏՏ-ում պետք է ունենա ոչ միայն տեխնիկական փորձ, այլև թիմում ներդաշնակորեն աշխատելու, գործընկերներին ոգեշնչելու և ընդհանուր գործում արժեքավոր ներդրում ունենալու կարողություն:
– Եթե կարողանայիք լուծել մեկ գլոբալ խնդիր՝ օգտագործելով տեխնոլոգիա, ո՞րը կլիներ այն և ինչպիսի՞ լուծում կստեղծեիք:
– Գիտեք, ես դեմ եմ կենդանիներին սպանելուն։ Կարծում եմ՝ սա գլոբալ խնդիր է։ Ես առաջին հերթին կզբաղվեի դրանով: Լուծումը շատ պարզ է՝ վարել բուսակերական ապրելակերպ։ Փոխարինել այն մթերքները կամ այն օգտակար նյութերը, որոնք ստանում ենք մսից՝ այլ ծագման մթերքներով։ Սննդի արդյունաբերությունն արդեն բավականին զարգացած է և արդեն հնարավոր է, օրինակ, մսի սպիտակուցը փոխարինել կաթով, ձվի և բուսական սպիտակուցներով և այլն։
– Ի՞նչ հոբբի կամ հետաքրքրություն ունեք։
– Ես սիրում եմ աշխատել, սիրում եմ շարունակել զարգանալ որպես մասնագետ: Ազատ ժամանակ զբաղվում եմ սպորտով կամ ծրագրավորմամբ։
– Եթե կարողանայիք արտահայտել Ձեր կյանքի փիլիսոփայությունը մեկ նախադասությամբ, ո՞րը կլիներ այն:
Հավանաբար, երբեք չհանձնվել: Երազել, նպատակներ դնել և չհանձնվել։
Սկզբնաղբյուր Fintech.am
