top of page

Փաշինյանի տիկտոկյան էջը վարող Ռուպր Դավոն գրանցվա՞ծ աշխատող է․ Արայիկ Հարությունյանը համառորեն չի պատասխանում

  • Writer: SMM Hub
    SMM Hub
  • May 28, 2024
  • 2 min read

Ամիսներ առաջ Oragir.News-ը գրել էր, որ ՀՀ վարչապետ Նիկոլ Փաշինյանի տիկտոկյան էջը վարում է 2018-ի իրադարձություններին ակտիվ մասնակցություն ունեցած, մշտապես Փաշինյանի ռուպրը ձեռքին պարզած և «Ռուպր Դավո» մականունը ստացած անձը։

Նա Փաշինյանի հետ ամենուր է՝ Ազգային ժողովում, Երևանում «զբոսնելիս», մարզեր ուղևորվելիս։ Ռուպր Դավոն կադրեր է որսում և տեղադրում Փաշինյանի տիկտոկյան պաշտոնական էջում։

Այս հանգամանքը հաստատում են ինչպես Նիկոլ Փաշինյանի ֆեյսբուքյան էջում, այնպես էլ Կառավարության յութուբյան ալիքում տեղադրված տեսանյութերը, որտեղ պարզ երևում է, թե ինչպես է Ռուպր Դավոն հեռախոսով նկարում Փաշինյանին։

Թեև մեզ համար պարզ է, որ հենց սույն անձն է վարում վարչապետի տիկտոկյան էջը, սակայն մայիսի 15-ին վարչապետի աշխատակազմի ղեկավար Արայիկ Հարությունյանին ուղղված գրավոր հարցում ենք ուղարկել և հարցրել․

«Ո՞վ կամ ովքե՞ր են վարում վարչապետ Նիկոլ Փաշինյանի տիկտոկյան էջը։

Արդյո՞ք աշխատակազմում նոր հաստիք է բացվել այդ աշխատանքի համար, նշեք հաստիքի անունը։

Որքա՞ն աշխատավարձ է ստանում Նիկոլ Փաշինյանի տիկտոկյան էջը վարող աշխատակիցը։

Ի՞նչ սկզբունքով է աշխատակազմը այդ աշխատանքը վստահել տվյալ անձնին կամ անձանց։

Ի՞նչ գիտելիքներ են անհրաժետ տվյալ աշխատանքը կատարելու համար, արդյոք տվյալ անձն ունի՞ բարձրագույն կրթություն։

Տվյալ աշխատակցի պարտականությունների մեջ ի՞նչ է մտնում, միայն տեսանյութերի պատրաստում և տեղադրո՞ւմ։

Ամսական որքա՞ն գումար է նախատեսվել տիկտոկյան էջի համար։

Մարզային այցելությունների ժամանակ արդյո՞ք առանձին տրանսպորտային միջոց է հատկացվում տվյալ աշխատակցին»։

Շուրջ 2 շաբաթ է անցել, սակայն Արայիկ Հարությունյանը՝ հերթական անգամ խախտելով ՀՀ օրենքը, չի պատասխանել այս հարցերին։

Ուշագրավ է, որ սույն պաշտոնյան դիմում է Դիտորդ մարմին և բողոքում, որ իր անվան հետ կապվող նյութը հրապարակելիս մենք կապ չենք հաստատել իր հետ և իր կարծիքը չենք նշել, բայց միևնույն ժամանակ անգամ գրավոր հարցմանը չի պատասխանում։

Ի դեպ, Կառավարության կայքում սույն պաշտոնյայի հեռախոսահամարը տեղադրված չէ, այլ միայն էլեկտրոնային փոստի հասցեն։

Oragir.News-ն այսօր փորձեց կապ հաստատել վարչապետի աշխատակազմի ղեկավարի տեղակալներ Արթուր Հովսեփյանի և Զարուհի Մաթևոսյանի հետ, սակայն վերջիններս ևս հեռախոսազանգերին չպատասխանեցին։

Հարց է առաջանում, թե ինչի համար են նշված անձինք քաղաքացիների վճարած հարկերից աշխատավարձեր ու պարգևավճարներ ստանում, եթե անգամ հեռախոսազանգերին չեն պատասխանում։


1/2601
bottom of page