Պետականության այս տարրական կանոնը չե՞ն հասկանում Հայաստանի «հպարտ» պաշտոնյաները. Ղազինյան
Հայաստանը շարունակում է «աննախադեպերի» շքերթը․ այդ մասին ֆեյսբուքի իր էջում գրել է «Հայաստան» խմբակցության պատգամավոր Արթուր Ղազինյանը:
«Նիկոլական Հայաստանը երևի աշխարհում առաջին պետությունն է, որի բարձրաստիճան պաշտոնյաները հրապարակավ հրաժարվում են թշնամու բանտերում պահվող իրենց զինվորներից՝ նրանց որակելով դասալիք:
Ցանկացած իշխանության առաջնահերթ խնդիրն է հասնել իր զինվորների վերադարձին, ապա նոր սկսել հետաքննություն՝ գերեվարման հանգամանքները պարզելու համար:
Կտրականապես արգելվում է որևէ մեղադրանք հնչեցնել փաստացի գերության մեջ գտնվող զինվորների հասցեին, քանի որ դրանով դու արդարացնում ես նրանց գերեվարման փաստը և քո զինված ուժերում անվստահություն սերմանում պետության նկատմամբ:
Զինվորը պետք է վստահ լինի, որ ցանկացած իրավիճակում պետությունը գալու է իր հետևից, չի լքելու և չի թողնելու իրեն անտեր՝ բախտի քմահաճույքին:
Պետականության այս տարրական կանոնը չե՞ն հասկանում Հայաստանի «հպարտ» պաշտոնյաները, թե՞ որոշել են վերջնականապես կործանել Հայկական պետականությունը»։
